今次我做澳門女

「個個女仔個袋好新啊，乜澳門啲人咁有錢買袋？」甲女問，
「緊係啦，澳門啲女仔，大把賭場老闆包…」乙女答。

放工時從巴士上聽到兩名港女的對答。

好在唔係講得好大聲，
唔係我敢擔保會俾全車澳門人圍攻到你哋落車為止。

港女，被人標籤為貪慕虛榮、串、揹Gucci/LV手袋的香港女人。
估唔到而家「澳女」竟然被人標籤為靠賭場老闆食飯的貪錢女。

由細到大，
似乎不斷面對身份認同的問題：
唔確認係香港人定澳門人，
唔知係葡文記者定中文記者，
唔知係女朋友定女性朋友，
唔知係現代人定東方人。

做澳門人俾同事話我香港人貪澳門特區政府的五千蚊，
以前舊公司做個陣，唔識葡文融入唔到葡文記者的圈子，同時又俾班中文記者排擠，
俾現代卡片做訪問，第二日會俾人打電話質問做乜上咗港聞。

不過我今次選擇用澳門人的身份同呢兩位港女講：
「你兩位，映衰哂啲港女，除了貪慕虛榮、串、鐘意揹Gucci/LV手袋之外，仲幫港女加多一宗罪－無知和膚淺，代表港女全體多謝你哋先！」

.