工作．職業

昨日在街上偶遇一位中學同學，
不發一言，卻依然深深感受到他十足的疲憊，
千言萬語只吐出一句「公司好多嘢做」，
絕對明白，
簡單一句是遠遠不足以表達他在工作上遇到的困難和辛苦。

隔行如隔山，
朋友和同學分散於各行各業，
基於工作的需要，
或多或少都對每個行業的工作有基本概念。
但無論如何詳盡地解釋工作上的情況，
如何申訴工作遇到的困難和壓力，
旁人亦只能理解，卻不一定能體會箇中感受。

正如我都無法向其他人解釋，
點解香港公司可以單單為了一張新聞圖片，
就可以炒咗個攝影記者。

職場
被大部分人視為維持生計的地方，
對某啲人來說，是一個挑戰和表現自我的戰場，
對於我來說，
目前做記者這份工作，可以搵到滿足感，
（雖然做得唔係好，哈！）

總之，
工作無非都係求財，或者求開心，
如果兩樣都搵唔到，咁不如轉工。
呢個世界不嬲都係人搵工的權利大於工搵人，
（至少目前都仲係），
在我的立場來講，
工作唔一定要做得出人頭地，
但至少要做得開心囉！

終於買了被行家謔稱「noise王」的LX2，
試相機一貼......
noise又真係幾重，但越睇越鐘意，
俾佢哋話我講極都唔聽...
:p

Time to leave

前加後減下，擠身新聞界前線快接近三年時間，
早前與一位行家兼師妹講開才回憶起，
我今時今日之所以做了記者，
是因為一位大學導師，
沒有他，可能今天我會在安安份份做個朝九晚五的上班族吧。

當年大三校內實習時，
我記得是選擇了做TV Production的，
後來那位講師建議我做TV組記者，
反正都係一份功課，無可無不可就做了記者，
之後順利成章就到報館做校外實習－做兼職－入行。

有好多事，差一線，結果就會完全唔同。

輾轉三年，
近日先後有兩位與我同期入行的記者將離開新聞界，
不免有點難過和失落的感覺，
但也明白是一種職場常態。

兩位都是我的好好朋友，
對她們的工作情況也略有所聞的，
對於她們的離開．．．其實話係被公司的惡劣待遇和制度逼走也不為過。
她們對工作都很認真，絕對唔係以hea的態度做新聞，
可算是出外工作時的最佳戰友，
祝願你哋轉職後會有更好的工作環境啦！
^_________^




今日以一個很特別的方式收到一份心儀已久的物件，
如果用你的聰明才智做壞事，
我估殺傷力一定很驚人。

又又又又又又又又又又又又又壞電腦喇!!!

屋企又壞電腦喇，
妖……..
唔知係咪間房風水唔好，
剋正部電腦，
我屋企啲Notebook總是壞得很頻密，
平均兩個月壞一次，
今次最離奇，
差唔到電引致強行關機，
想點先…

對於我呢啲沉迷網絡的青年來說，
無得上網係一種折磨，
壞電腦期係一種忍耐，
不過唔知仲要忍幾耐。

童年回憶一則

今日突然在腦海中閃出一段回憶，
其實我已經無乜印象，
但我的潛意識記得。

當年三歲入幼稚園的時候，
唔知因乜事幹，
我極度唔願意返學，
一入課室就開始喊，
仲係要放聲大哭個種…直至放學。

煩人的程度，
俾著我會直頭將個細路沖落廁所。

當時有個堂哥或表哥之類的人同我同班，
只要同佢坐埋一齊就唔會再喊，
之後個班主任就迫住安排我同個堂哥/表哥一齊坐。

如果再唔收聲就趕我出班房，
由得我喊。

有一次好似係學校組織去旅行（其實都係去附近的公園仔），
之後好似因為落雨就無去到，
全級幼稚園的小朋友被安排留係操場，當去咗旅行，
（班番薯都無乜所謂啦，只不過美其名高高興興食一餐啫~）

重點係當大家都圍住一圈圈食零食之際，
唔知點解我無買到零食，
而且成個書包都好似放滿返學用的書，
（但我估應該係屋企人唔知，可能我上堂掛住喊，聽唔到老師話要去旅行，結果就無同屋企人講）。

當時只有三歲又鐘意喊的何小花，
竟然無喊、無痴住我堂哥/表哥，
仲懶有骨氣咁唔肯埋堆（可能實在係太無面喇，哈哈！）
記憶中個畫面就係我揹住個書包係操場到踱來踱去。

當年得三歲，我唔知我係個操場個一刻諗緊乜嘢，
但今日湧出記憶之際，
突然覺得好心酸。

家長真係要留意下子女在學校的情況和安排，
否則個女返學去旅行，無買零食真係好慘~
仲會留下一個唔係幾好的童年回憶。

In focus on the days

尋晚同兩個Baby上星際飲嘢，
個場嘈到啊...幾好坐都假。
三人要嗌住傾計，同隊live band鬥大聲，
今朝起身已經Feel到喉嚨有唔妥，
相信兩位Baby的情況可能更嚴重。
勁掛住TST北京道一號的Auqa~~

















流感高峰期，
屋企已有兩人中招，
前兩日先懶醒周圍同人講，好耐都無病過，
結果今日係咁打乞嚏，喉嚨又唔思舒，
唔知係咪領咗嘢，
都話做人唔好太招搖。

今日特登早起，打算八卦見下同事的嫂夫人，
點之有人甩底，
算…有人應該要請食飯補數啦～

之後應華女的推薦，
去咗河東圖書館睇雜誌，
事時、潮流、娛樂、科技、育兒、文學…
啲雜誌齊到…你嗡得出嘅都應該有得睇，
勁Hea三粒幾鐘。
河東新翼真係幾靚，
明顯睇得出室內設計有心思。


窗外花園景一













窗外花園景二



















聽聞啲貓仔好冷漠，
自從上星期諮詢過佢哋意見，
問吓養多隻貓仔好唔好之後，
就即晚同Chris分房訓，
出門口時同佢講聲又唔睬人。

我今日上到去，
竟然唔俾抱，
車…唔鐘意咪唔養，
有咩唔滿意咪三口六面講清楚囉，
使唔使咁串………超………

















話完佢兩句之後，
又主動行埋嚟嗲返，
仲要係超嗲，
啲老闆真難服侍；














有啲嘢我無需要向外人解釋，
關你咩事，我鐘意呀！
使乜你去judge我的行為，
何況係啲外人一廂情願的無聊諗法，
無聊！

樹樹樹樹.......

國父紀念館入面七十幾歲的老樹被砍掉了，
樹本身被白蟻侵蝕多年，已病入膏肓，
早前再因為天氣嚴寒，最終抵受不住，
死了。

之後為免有日塌下來而被砍掉了，
七十多年喇，好可惜。

今日行近啲諗住睇吓棵樹的殘骸，
結果俾某電視台的攝影行家話我係人哋傷口上灑鹽，
係絕對無啲咁嘅事！






















蘭姨，
謝謝你有來這裡，
都係啦～
呢度算係自己地方，
想講咩就講咩。

其實我係一個成日都想拍枱的人，
係出面要注意一言一行啫，
係呢度唔使嘛。

嬲！！！

今日做寵物愛心大遊行，
有好多狗仔貓仔一齊行，
本應新鮮又好玩，畢竟係第一次嘛，
絕對有寄工作於娛樂的感覺。

不過過程中發生一件小插曲，
搞到本小姐嬲到死。

話說在遊行期間，
邊走邊影邊看之際，
突然發現兩名大學女同學參與其中，
其中一人手上拖住她的寵物狗。

這兩人，在大學同班時一直無乜交情，無乜兩句，
但又未至於交惡的地步。

今日…我同其中一人四目交投，
基於禮貌和習慣，
我隨即向她報以一個100%誠意＋善意的點頭和微笑，
點之…對方竟然拎開塊面，扮睇我唔到！！！！

相識四年多，
已經唔係第一次係咁，
一下子，十級無明火起，
我當下幾想即刻衝埋去，
粗暴咁扯住佢件衫領喝佢：「你有無家教0架你!??!??!」

最後緊係無啦…
算...禍不及人哋父母...忍住…忍住...
不過條氣頂住到而家，超嬲！！
咁無禮貌都有！！
0胡~~0胡~~~~0胡~~~~

頂…XY你個Z吖…$*#&#*@*…(下省一百字…係！係一百個粗口字…！)
嬲…
十個嬲…

點解啲人可以咁敗家

我今年的生日禮物，
THX Chirs～
^_^





我的香水櫃...
唔知點解...啲女人錢係咁易賺，
做生意，點都係賣女仔野就會勁好搵～

Silent Hill

為了《Room of Angel》呢首歌，
引發起我對《Silent Hill》的了解，
結果明白了一些日本製造的指令Game，
點解可以令到打機的人（尤其係男仔）咁沉迷。

故事內容不多說，
之前亦都拍了電影版，不過我未睇，
有興趣不妨在link去呢度睇清楚的解說：
Silent Hill Part 1－簡說
Silent Hill Part 2－解謎

睇完《Silent Hill》的故事之後，
禁不住對這些指令遊戲大力稱讚一下，
因為從未玩過，不太懂得如何去形容，
只能說這些指令遊戲，絕對不是劣作，
百分百承傳了日本製造的認真和精緻。

Silent Hill故事內容的安排和細節，
既細密又合乎常理，
畫面亦繪得十分精彩，
設計遊戲的人真係好叻，
不管是對故事人物的人性扭曲，
抑或係故事中妖怪的人體扭曲，
都令人心寒，想像力驚人！

或者玩遊戲的人在過程中，
就是迷上豐富的想像力和精緻的動作場面繒畫吧！
追逐到最後，尋找故事的結果。

講到底，
所有令人害怕和心寒驚慄的事情，
都是源於人類的想像和創作，
人類才是真正令人心寒的源頭。

好友要結婚了

年紀只小我一天的亞瑩要結婚喇！
衷心的恭喜您！
接下來的日子，
一定要忙著做一大堆的準備工作，
但過程就算忙，就算繁瑣，
都是很甜蜜的一種經歷吧？

您自中學以來，一直都是令人擔心的一個，
而家找到好歸宿，
令人放心之餘，
都要老套地叮囑您要好好珍惜身邊的人；

老實說，
您是一個很任性的人，
脾氣也很情緒化，
常常讓人覺得無所適從，
總是要讓身邊的人遷就；

不知道您看到後會不會生氣，
但人家對您好，並不是必然的，
所以，要好好珍惜別人對您的好，
要珍惜別人對您的忍讓和體諒，
好嗎？

做了人老婆，身份轉變後，
都要好好對待邊的人啊！
最重要令您未來老公覺得娶到您係佢福份，
好嗎？
^___^

聽到您的婚訊後，
近日總是不時浮起四人晚上在K場抱在一起的畫面；

既是兩難，至少應該揀一個開心的

您看我平時好似一副牙嘴利的樣子，
您說我的問題總是尖銳得讓您走投無路，
但講到要說安慰人的話，其實我都會變得啞口無言，
聽到您說其實不快樂，難過的感覺一直維持了好久。

每次與您聊天的時間總會過得好快，
一小時兩小時三小時四小時，
聊著聊著就很快很快地過去。

由凌晨聊到清晨，不得不去睡了，
卻突然神經地在一個從未試過醒來的清晨六時多時份醒來，
（除非未瞓的日子～哈哈～）
Earphone此時突然傳來兩句說話
－－－世界上很多事情都是兩難的。
－－－到底錯與對條線由邊個去劃呢?

今日腦子一整天都在想起您的事情。

世界上有無絕對黑與白，
我家姐說沒有，
我老闆都說沒有，
您也是與我斷言地說沒有，
既然有人說，不可以因為擔心別人犯法而不讓人去做合法的事，
那麼，您也不可以因為擔心會發生錯的事而不去做對的事，是嗎？

您今天的選擇其實沒有所謂的好和不好，
但既然這個選擇沒有人因而覺得開心，
至於連選擇的您都覺得不開心，
咁我真係諗唔到原因／諗唔到有邊個可以認同您選擇這個選擇。

我明白您的顧慮， 卻難認同，
將來的事無人知，
正如我成日都覺得我唔知會唔會聽日就死，
點解仲要諗到一啲睇唔到咁遠的將來？
然後逼自己做一個唔知啱唔啱但一定唔開心的選擇，
我不明白。

您說你的固執拍得住我的硬頸，
事實證明一直以來大家也無法說服大家，
但講埋最後一次喇，
距離十二月七日不是還有很遠的時間，
能選擇的時間一日比一日短，
希望你在僅存仲有得選擇的時間下，
選擇一個自己會開心的選擇，
唔好無得揀先後悔，
好多事未試過唔會知最後結果，
試過，至少會心息。

作為朋友，
祇希望你開心，
真的。