加價加價乜都貴哂

前一派先同同事朋友講:而家通漲真係好嚴重,
乜都加價,而家我一日兩餐食飯+買水,唔買嘢,用月票坐巴士,
閒閒哋每日都使成六十幾蚊~真係好貴~!

結果今日晚餐去買麵食時,
平時賣開$19.5的肉絲炒麵竟然加價到$21.5,
升幅超過一成,貴得嚇人;
而我平時一向"走芽菜",麵店都會轉菜心俾我,
結果今晚只換了平價的菲菜,非常慳皮~!

我俾錢時不肯定咁再問老闆:加咗價咩?加成兩蚊喎!
點之老闆"暗暗噚噚"係咁講:係囉~而家啲嘢貴哂,伙計又加咗人工,最低級個個都加咗成15%,政府真係想迫死我哋...咁講;

老實講,唔知老闆講呢啲嘢係咪要解釋佢嘅加價係迫不得已,而且加得好合理,
但對我呢個小市民+打工仔嚟講:你加啲伙計人工,你就加我價,但我無加人工喎,咁條數點計先~!?

澳門經濟似乎真係好咗大家都有眼睇,
但點解啲老闆又話經營困難?又話人工貴請唔到人呢?
點解啲打工嘅又無加人工?又話啲嘢貴咗?追唔上通漲?
咁到底真係賺到錢嘅係咩人?加咗人工的打工仔係咪真係存在?為數多唔多?
除咗政府的收益有實質數據支持顯示經濟好咗之外,
似乎就只有大財團真正"享受"到經濟成果,

澳門搞成咁到底邊個先有真正得益?
我只係知道而家啲嘢鬼死咁貴~
上年睇到一名香港居民向財政司控訴:我一餐可以只食幾蚊一碗公仔麵,但我交通費一日幾十蚊真係慳唔到,司長你教吓我點生活落去?

好驚澳門都會走到呢一步~
就呢盒麵給我的啟示,
難怪有位資深(資歷+薪資)的女行家都同謝志偉呻:我覺得我的生活素質下降緊!