令我感到羞窘的街坊

我一直都覺得澳門的3號巴士具有很獨特的國際性，
從港澳碼頭到關閘的途中，不但有大量本地居民會上落巴士，
還有很多的自由行旅客：來自西方的、中國內地的、香港的、日本的、韓國的、台灣……

前兩日坐3號巴士時，由於天氣寒冷，司機應該無開冷氣（都好合情理），
巴士由關閘向着港澳碼頭的方向走，去到新馬路時，好多人逼咗上車，
當時有一部分的香港旅客也在車上，（看得出來哦！）
亦都有一位年約四十多歲的婦人，手持“推車仔”（到拱北買餸的那種）擠在巴士裡。

起初，那個婦人不停的用手朝臉上搧動，最後實在忍不住：
“司機，可唔可以開冷氣呀？想熱死人咩？”
司機應咗佢一句：“咁凍仲開冷氣？一係開少少窗啦。”
婦人可能不滿意司機的回應，開始勞氣起來：
“開少少冷氣都唔得，想熱死人咩？每月都賺大把錢都咁孤寒，都唔知咩巴士，下次咪鬼搭你，幫襯澳巴仲好！政府畀成幾十億超哂支搞個乜鬼東亞運，都唔捨得開少少冷氣。”（東亞運超支又關巴士公司唔開冷氣事？）

有個亞叔顯然對東亞運超支問題好有興趣，搭訕說：
“係囉幾十億搞個乜鬼運動會，一人派一千蚊咪仲好。”
當時全車人都無出聲，淨係聽住兩人的“妙對”。

對於有市民關心澳門時事，我感到高興，證明佢哋有關心澳門新聞，
會了解身處環境發生緊咩事。
對於有市民敢於在公開場合發表自己的意見，也是值得鼓勵的，畢竟澳門係有言論自由的嘛。

但係，在一知半解、不明所以的情況下公開發表不滿就顯得好無知，
當時我係車上真的有一點點羞窘，
大家同是澳門人，當“同鄉”在“外人”面前失禮時（當時有外來旅客在車上呢），也是亂沒面子一把的。

現時的澳門已經不再單純是“自己地方”，
各位同胞的一言一行也是旅客留印象的很重要部分，
無知不是罪，但放大自己的無知不但失禮自己，也會失禮街坊。